Statistikat e publikuara nga Banka e Shqipërisë, tregojnë se stoku i kredisë së dhënë për bizneset, individët dhe kompanitë shtetërore arriti në 541.5 miliardë lekë, duke shënuar një rritje prej gati 1% në krahasim me muajin e mëparshëm. Ndikimin kryesor në këtë rritje e ka dhënë rritja e huas në euro për bizneset, por edhe për individët. Huaja e sipërmarrjeve në euro u rrit me gati 2% me bazë mujore, ndryshe nga ajo në lekë po për të njëjtën kategori, që u zgjerua me 0.6% në raport me muajin e mëparshëm.
E njëjta tendencë ishte dhe për huanë për individë, ku rritja në euro me bazë mujore ishte 1.4% dhe ajo në lekë me 0.4%. Në fund të muajit shkurt, pesha e kredisë në lekë shënoi një ulje të lehtë, nga 50.4% në 50%, ndryshe nga tendenca e muajve të kaluar kur huaja e dhënë në monedhën vendase po shënonte një tendencë rritëse. Në krahasim me muajin shkurt të një viti më parë, kur Banka e Shqipërisë nisi një strategji për të ulur nivelin e euroizimit në ekonomi, duke i orientuar bankat që të fokusoheshin te huaja në monedhën vendase, pesha e kredisë në lekë ka mbetur pothuajse e pandryshuar.